پاکستان اورامریکہ کے درمیان قریبی اور مضبوط تعلقات دونوں ممالک کے مفاد میں ہیں
صدر پرویز مشرف کی امریکہ کے ممتاز خارجہ پالیسی تجزیہ نگار ڈاکٹر ہرلن المین سے بات چیت

 اسلام آباد ۔ 26 جولائی (اے پی پی) صدر پرویزمشرف نے کہا ہے کہ پاکستان اورامریکہ کے درمیان قریبی اور مضبوط تعلقات دونوں ممالک کے مفاد میں ہیں، پاکستان دہشتگردی اور انتہا پسندی کے خاتمہ کےلئے پختہ عزم رکھتا ہے۔ وہ ہفتہ کو امریکہ کے ممتاز خارجہ پالیسی تجزیہ نگار ڈاکٹر ہرلن المین سے بات چیت کر رہے تھے۔ ملاقات کے دوران پاک۔ امریکہ تعلقات اور علاقائی صورتحال بھی زیر غور آئی۔

وزیراعظم کا دورہ امریکہ انتہائی اہم ہے، دہشت گردی سے نمٹنے کیلئے جامع حکمت عملی اور قبائلی   علاقوں کی صورتحال کے بارے میں امریکی صدر کو آگاہ کریں گے، نواز شریف سے ملاقات شیڈول میں شامل نہیں
وفاقی وزیر اطلاعات و نشریات شیری رحمن کی امریکہ روانگی سے قبل چکلالہ ایئر بیس پر صحافیوں سے بات چیت

 اسلام آباد ۔ 26 جولائی (اے پی پی) وفاقی وزیر اطلاعات و نشریات شیری رحمن نے کہا ہے کہ وزیراعظم سیّد یوسف رضا گیلانی کا دورہ امریکہ انتہائی اہم ہے، دورہ کے دوران امریکی قیادت سے ترقیاتی اور جمہوری ثمرات پر بات چیت ہو گی، وزیراعظم دہشت گردی سے نمٹنے کیلئے پاکستان کی جامع حکمت عملی اور قبائلی علاقوں کی صورتحال کے بارے میں امریکی صدر کو آگاہ کریں گے۔ ہفتہ کو وزیراعظم کے ہمراہ امریکہ روانگی سے قبل چکلالہ ایئر بیس پر ذرائع ابلاغ کے نمائندوں سے بات چیت کرتے ہوئے وفاقی وزیر اطلاعات و نشریات شیری رحمن نے کہا کہ کئی سالوں کے بعد پاکستان سے جمہوری عمل کے بعد منتخب ہونے والے کسی وزیراعظم کا یہ امریکہ کا دورہ ہے جو انتہائی اہمیت کا حامل ہے۔

بھارت کے ٹیکسٹائل مرکز احمد آباد میں یکے بعد دیگرے 6 بم دھماکے ، 4 افراد ہلاک ، 15 زخمی

 احمد آباد ۔ 26 جولائی (اے پی پی) مسلم کش فسادات کے حوالے سے شہرت یافتہ بھارتی ریاست گجرات کے دارالحکومت اور ٹیکسٹائل سٹی احمد آباد میں ہفتہ کو بنگلور کی طرز پر یکے بعد دیگرے 6 بم دھماکوں میں 4 افراد ہلاک اور 15 زخمی ہوگئے۔ بھارتی ذرائع ابلاغ نے پولیس حکام کے حوالے سے بتایا ہے کہ یہ بم سائیکلوں پر رکھے گئے کھانے کے ٹفن میں چھپائے گئے تھے۔

متنازعہ کشن گنگا منصوبے کے بارے میں بات چیت جاری‘ پاکستان کے شدید اعتراضات
 جماعت علی شاہ 29 سے 31 جولائی تک بگلیہار پاور پراجیکٹ کا دورہ کریں گے

 نئی دہلی ۔26 جولائی (اے پی پی) پاکستان اور بھارت کے درمیان متنازعہ کشن گنگا پن بجلی کے منصوبے کے بارے میں بات چیت ہفتہ کو بھی یہاں جاری رہی ۔ پاکستان نے مقبوضہ کشمیر میں دریائے نیلم پر بھارت کی جانب سے تعمیر کئے جانے والے اس منصوبے پر شدید اعتراضات اٹھائے ہیں ۔ میڈیا رپورٹس کے مطابق بھارت نے منصوبے پر کام کی رفتار تیز کردی ہے کیونکہ وہ آزادکشمیر میں چین کے تعاون سے نیلم جہلم منصوبے کی تکمیل سے قبل ہی اس مکمل کرنا چاہتا ہے۔ بات چیت میں پاکستان کے انڈس واٹر کمشنر سید جماعت علی شاہ نورکنی وفد کی قیادت کررہے ہیں بات چیت 28 جولائی تک جاری رہے گی جس میں بھارتی وفد کی قیادت انڈس واٹر کمشنر جی رگھوناتھن کررہے ہیں ۔

پی ٹی وی انتظامیہ اشتہارات کی مد میں واجب الادا رقوم کی وصولی کا کام تیز کرے، اشتہارات کیلئے معاہدوں سے قبل متعلقہ افراد کے ریکارڈ کی تفصیلی چھان بین کی جائے، بڑی نادہندہ مچھلیوں کے نام شائع کئے جائیں گے
سینٹ کی کمیٹی برائے اطلاعات و نشریات کی ذیلی کمیٹی کا اجلاس، کارپوریشن میں کریڈٹ کنٹرولر تعینات نہ کرنے کا سخت نوٹس

 اسلام آباد ۔ 26 جولائی (اے پی پی) سینٹ کی قائمہ کمیٹی برائے اطلاعات و نشریات کی ذیلی کمیٹی نے پی ٹی وی انتظامیہ کو ہدایت کی ہے کہ وہ اشتہارات کی مد میں طویل عرصہ سے واجب الادا رقوم کی وصولی کا کام تیز کرے۔ اشتہارات کیلئے معاہدے کرنے سے قبل متعلقہ افراد کے ریکارڈ کی تفصیلی چھان بین کی جانی چاہئے۔ بڑی نادہندہ مچھلیوں کے نام شائع کئے جائیں گے۔ ذیلی کمیٹی کا اجلاس ہفتہ کو یہاں سینیٹر طارق عظیم خان کی زیر صدارت منعقد ہوا۔ اجلاس میں سینیٹر میر محمد نصیر مینگل اور محترمہ طاہرہ لطیف، ایڈیشنل سیکرٹری وزارت اطلاعات و نشریات، چیئرمین، ایم ڈی پی ٹی وی اور پی ٹی وی کے شعبہ سیلز و اکاﺅنٹ سے متعلقہ اعلیٰ افسروں نے شرکت کی۔