صدر آصف علی زرداری کی برطانوی وزیر خارجہ کے نمائندہ خصوصی سرشیرارڈ کوپر کولس سے گفتگو

          اسلام آباد ۔ 10 مارچ (اے پی پی) صدر آصف علی زرداری نے اس امر پر زور دیا ہے کہ پاکستان اور برطانیہ کو بالخصوص تجارت، سرمایہ کاری اور تعلیمی ترقی کے مختلف شعبوں میں شراکت کار کو مزید فروغ دینے کیلئے ملکر کام کرنے کی ضرورت ہے۔ انہوں نے یہ بات برطانوی وزیر خارجہ کے نمائندہ خصوصی برائے افغانستان و پاکستان سرشیرارڈ کوپر کولس سے بدھ کو ایوان صدر میں گفتگو کرتے ہوئے کہی۔

وزیراعظم یوسف رضا گیلانی کی وزراءاور ارکان پارلیمنٹ کے وفد سے گفتگو

          اسلام آباد ۔ 10 مارچ (اے پی پی) وزیراعظم سید یوسف رضا گیلانی نے عام آدمی کیلئے ریلیف کو حکومت کی ترجیح قرار دیتے ہوئے منتخب ارکان پارلیمنٹ پر زور دیا ہے کہ وہ اپنے اپنے علاقوں میں ترقیاتی کام کی نگرانی کریں اور عام آدمی کے ریلیف کا جائزہ لیں۔ بدھ کو وزیراعظم سیکرٹریٹ میں وزراءاور ارکان پارلیمنٹ کے ایک گروپ سے گفتگو کرتے ہوئے انہوں نے کہا کہ معیشت کو تقویت دینے کے لئے سرکاری‘ نجی شراکت داری کو فروغ دینے کی ضرورت ہے۔

وفاقی کابینہ نے پی آئی اے، سٹیل ملز، پیپکو، ریلویز، این ایچ اے، پاسکو، ٹی سی پی اور یوٹیلٹی سٹور کی تنظیم نو کی منظوری دیدی

خسارے میں چلنے والے 8 اداروں کے بورڈز اور سربراہان جون تک فارغ کرنے کا فیصلہ

وفاقی کابینہ کا اجلاس

          اسلام آباد ۔ 10 مارچ (اے پی پی) وفاقی کابینہ نے اربوں روپے کے خسارے میں چلنے والے سرکاری اداروں پی آئی اے، اسٹیل ملز، پیپکو، ریلویز، این ایچ اے، پاسکو، ٹی سی پی اور یوٹیلٹی سٹورز کی تنظیم نو کی منظوری دیدی جس کے تحت ان اداروں کے سربراہان اور بورڈز کو تبدیل کر دیا جائے گا۔ وفاقی کابینہ کا اجلاس بدھ کو وزیراعظم سید یوسف رضا گیلانی کی زیر صدارت ہوا۔ کابینہ کو خسارے میں چلنے والے آٹھ اداروں کی تنظیم نو کیلئے 16 دسمبر 2009ءکو قائم کی گئی خصوصی کمیٹی کی سفارشات کے بارے میں بریفنگ دی گئی۔ کابینہ نے کمیٹی کی سفارشات کی منظوری دیدی۔

وفاقی وزیر اطلاعات و نشریات قمر زمان کائرہ کی اے پی این ایس کے وفد سے گفتگو

          اسلام آباد ۔ 10 مارچ (اے پی پی) وفاقی وزیر اطلاعات و نشریات قمر زمان کائرہ نے کہا ہے کہ موجودہ جمہوری حکومت آزادی اظہار رائے پر یقین رکھتی ہے اور آزاد میڈیا کے ذریعے اطلاعات کی فراہمی میں سہولت کیلئے مناسب اقدامات کر رہی ہے۔ بدھ کو یہاں آل پاکستان نیوز پیپرز سوسائٹی کے صدر مجیب الرحمان شامی کی سربراہی پر مشتمل اے پی این ایس کے وفد کے ساتھ بات چیت کرتے ہوئے قمر زمان کائرہ نے کہا کہ حکومت نے اطلاعا تتک لوگوں کی رسائی کیلئے متعدد اقدامات کیئے ہیں اور بینظیر بھٹو شہید کے وژن کے تحت فریڈم آف انفارمیشن کو یقینی بنانے کیلئے تمام سٹیک ہولڈرز کے ساتھ کام کر رہی ہے۔